HABARI

Theme images by kelvinjay. Powered by Blogger.

MATUKIO

MICHEZO

SIASA

CDA Wadaiwa Kuficha Viwanja 34,000

By: VIJIMAMBO on May 30, 2017 / comment : 0 , ,

Waziri  wa Ardhi, Nyumba na Maendeleo ya Makazi, William Lukuvi, amedai kuwa waliokuwa wafanyakazi wa Mamlaka ya Ustawishaji Makao Makuu (CDA) wameficha zaidi ya viwanja 34,000.

Lukuvi ambaye amewahi kuwa Mwenyekiti wa CDA kwa miaka kadhaa, pia amesimulia jinsi wabunge wanne walivyotapeliwa na wafanyakazi wa mamlaka hiyo.

Hivi karibuni, Rais Dk. John Magufuli aliifuta mamlaka hiyo na shughuli zake kuhamishia Manispaa ya Dodoma.

Akizungumza mjini hapa jana wakati wa ufunguzi wa mkutano wa Chama cha Wapima Ardhi Tanzania (IST), Lukuvi alisema viwanja vilivyopimwa Manispaa ya Dodoma vilikuwa 60,000, lakini vilivyoonekana ni 26,000 tu huku 34,000 vikiwa vimefichwa na wafanyakazi wa mamlaka hiyo.

Alisema baada ya kufanya uchunguzi, Serikali imegundua wafanyakazi wengi wameiba viwanja na kuviuza kwa watu wengine.

Lukuvi alisema kulikuwa na utaratibu wa wafanyakazi wa CDA kuuza viwanja kwa njia za panya kwa Sh milioni 5, kisha mhusika kupelekewa nyaraka mahali alipo.

Alisema kuna wabunge wanne waliuziwa viwanja kwa kutoa Sh milioni 5, lakini kesho yake rais akaivunja mamlaka hiyo na kujikuta wakitapeliwa.

Lukuvi alisema wabunge hao walikwenda kumlilia wakitaka kurudishiwa fedha hizo, lakini jambo la kushangaza hawakuwa na ‘invoice’ ya aina yoyote.

“Sasa wapo watu ambao wamewalipa hizo milioni tano, halafu kesho yake ikala kwao, Mheshimiwa Rais kaifuta CDA, ndiyo wanakuja kusema kwangu, watalipwaje? Nimewaambia nipeni risiti wanasema hawana. Nitawapa kitu gani? Majina ninayo,” alisema.

Alisema wale wote walioiba viwanja hivyo vitawatokea puani, kwani Serikali tayari inayo ripoti nzima juu ya wizi huo.

 “Serikali inakosa mapato, sasa tunataka viwanja vipimwe vingi ili tuweze kujiingizia mapato,” alisema.

Aidha Lukuvi alimbana aliyekuwa Mpimaji Mkuu wa CDA, Frank Mkomochi ambaye alikuwapo katika mkutano huo, akidai kuwa ni mmoja ya watu waliohuka kusimamia uuzwaji wa viwanja maeneo mengi.

“Viwanja Itega vilikuwa vinauzwa milioni tano, sasa vinauzwa milioni 25, hili hujalisikia wewe mtu wa CDA?” alimuhoji.

Kwa upande wake, Mkurugenzi wa IST, Martin Chodota, aliomba Serikali kutoa kipaumbele kwa kampuni za wazawa na kuacha kuwapa nafasi zaidi wapimaji wanaotoka nje.

WAZIRI LUKUVI AMTUMBUA AFISA MIPANGO MIJI LINDI

By: VIJIMAMBO on May 03, 2017 / comment : 0 , ,


 Waziri wa Ardhi, Nyumba na Maendeleo ya Makazi Mhe. William Lukuvi akimsimamisha kazi Ndugu Castory Manase Nkuli Afisa Mipango Miji wa Lindi kuhusu tuhuma za kumilikisha ardhi kinyume cha sheria.

 Na. Hassan Mabuye & Muhammad Salim
Waziri wa Ardhi, Nyumba na Maendeleo ya Makazi Mhe. William Lukuvi ameamuru kusimamishwa kazi Afisa Mipango Miji wa Lindi Ndugu Castory Manase Nkuli baada ya kunyang`anya ardhi ya vijiji vya Ruvu na Mchinga hekari 4000 na kumilikisha kampuni ya Azimio Housing Estate kinyume cha sheria ya Ardhi.

Mhe. Lukuvi aligundua hayo baada ya kuona utaratibu wa umilikishaji wa ardhi haukufuatwa  na badala yake kuonekana kuwa na mianya ya rushwa kwa kuwa ardhi hiyo imehamishwa kutoka ardhi ya kijiji hadi kumilikishwa kwa kampuni ya Azimio ambapo kisheria ilitakiwa hati ya eneo hilo itoke kwa idhini ya Rais.

Aidha, Afisa Mipango Miji huyo aligundulika kuwa na kosa la kughushi kwa kujifanya ni Afisa ardhi baada ya kuandika barua na kuisaini kwa niaba ya Afisa ardhi wakati yeye ni Afisa Mipango Miji ili kuimilikisha kampuni ya Azimio Housing Estate ambalo pia ni kosa kisheria.

Akithibitisha makosa hayo Kaimu Mkurugenzi Mipango Miji na Vijiji kutoka Wizara ya Ardhi Bi Immaculate Senje amesema kwamba utaratibu wa umilikishaji wa ardhi hiyo haukufuatwa ambapo kisheria ilitakiwa hati ya eneo hilo itoke kwa idhini ya Rais na baada ya Tangazo la Serikali na kuridhiwa na wana kijiji. 

 “Kama nyie hamna uwezo wa kumfukuza kazi basi mie namsimamisha kazi kuanzia leo hafai kuwa mtumishi wa serkali” alisema Mhe. Lukuvi na kuagiza eneo hilo lirudi na kuwa mali ya serikali “ Sasa hiyo ardhi lazima irudi itakua mali ya serikali kuanzia leo” .

katika ziara hiyo, Mhe. Lukuvi ametembelea ofisi za ardhi Lindi na kufanya ukaguzi katika Masijala za ardhi na kuangalia mfumo wa ukusanyaji kodi ya pango la ardhi, kisha kuwaagiza watendaji wa ardhi mkoani hapo kuhakikisha wanatoa hati kwa wakati na kukusanya kodi ya pango la ardhi kwa kila mmiliki wa ardhi ili kuongeza pato la serikali.


Pia alitembelea ofisi za Shirika la Nyumba la Taifa (NHC) mkoani hapo na kupokea taarifa kutoka kwa Meneja wa shirika hilo mkoani Lindi Ndugu Gibson Mwaigomole. Katika taarifa hiyo Mhe. Lukuvi amelishauri Shirika la Nyumba la Taifa kufanya uwekezaji mkoani Lindi kwa kujenga ofisi za kisasa pamoja na Nyumba zenye gharama nafuu.

Aidha, Mkuu wa Mkoa wa Lindi Mhe. Godfrey Zambi akiwa pamoja na waziri Lukuvi na watendaji wa mkoa ameeleza kuwa sekta ya ardhi mkoani hapo inachangamoto nyingi lakini ofisi yake inaendelea kufanya jitihada za makusudi kuhakikisha changamoto hizo zinapungua au kuzimaliza kabisa kwa maslahi ya watu wa Lindi na Tanzania kwa ujumla.

MBUNGE WA KWIMBA APEWA SIKU SABA KULIPA DENI LA ARDHI ANALODAIWA TANGU 2010

By: VIJIMAMBO on May 02, 2017 / comment : 0 , ,

Waziri wa ardhi,nyumba na Maendeleo ya makazi Mh. William Lukuvi amemuagiza Mkurugenzi wa Halmashauri ya jiji la Mwanza,Kiomoni kibamba pamoja na watumishi wa idara ya ardhi na mipango miji,kuacha ubabaishaji katika kusimamia zoezi la urasimishaji wa makazi holela,sambamba na kutoa muda wa siku 7 kwa Mbunge wa Jimbo la Kwimba Mh. Shanif mansoor kulipa deni la zaidi ya shilingi milioni 500 la kodi ya ardhi analodaiwa tangu mwaka 2010.

Waziri Lukuvi ametoa agizo hilo jijini Mwanza wakati akisikiliza kero za wananchi wa kata ya Mahina,ambapo amesema Halmashauri hiyo imekuwa ikiwachukulia hatua za kisheria wananchi wenye maeneo madogo ya ardhi,huku ikiwaacha watu wenye maeneo makubwa ambao wameshindwa kulipa kodi kwa miaka zaidi ya kumi,jambo linaloikosesha mapato serikali na kumtaka Mbunge huyo kulipa deni hilo la shilingi milioni 529 linalotokana na kumiliki eneo la ardhi lenye ukubwa wa hekta 39 lililopo kata ya Buhongwa ifikapo Mei 5 mwaka huu.

Wakazi wa Mahina wakatoa ya moyoni kuhusiana na urasimu uliopo katika idara ya ardhi jijini Mwanza, yakiwemo malalamiko ya upotevu wa mafaili.
Mh. Lukuvi ambaye yupo katika ziara ya kukagua utekelezaji wa zoezi la urasimishaji wa makazi holela,katika baadhi ya mikoa ya Kanda ya Ziwa pia amebaini njama za kutaka kupewa taarifa za uongo na baadhi ya maofisa ardhi wa jiji la Mwanza kuhusiana na suala la viwanja vilivyopimwa.

Mkurugenzi Ilemela apewa onyo

By: VIJIMAMBO on May 01, 2017 / comment : 0 , , ,

WAZIRI wa Ardhi, Nyumba na Maendeleo ya Makazi, William Lukuvi, amemtahadharisha Mkurugenzi wa Mtendaji wa Halmashauri ya Manispaa ya Ilemela, John Wanga, kwamba endapo atashindwa kusimamia vema agizo la urasimishaji makazi holela na uandaaji wa hati miliki kwa wananchi, atatumbuliwa.

Alitoa tahadhari hiyo juzi baada ya kusomewa taarifa ya utekelezaji wa   urasimishaji na uandaaji wa hati za ardhi ambako Halmashauri ya Ilemela imetekeleza kwa asilimia moja kwa kuandaa hati 834 huku viwanja  vingine 16,000  vikiwa vimepimwa bila kuandaliwa hati.

 Lukuvi  ambaye alionekana kukasirishwa na hali hiyo alisema kushindwa kuandaliwa    hati hizo  ndani ya Halmashauri ya Ilemela ambayo ina maofisa ardhi  na watathmini zaidi ya 40 kmeisababishia  hasara   Serikali.

Alisema kazi hiyo ingefanyika ilivyotarajiwa serikali ingepata  mapato ya  Sh bilioni 2.5 kwa mwaka lakini kilichopatikana  ni Sh bilioni 1.3 tu.

“Hakuna halmashauri nchini iliyo na watumishi  wengi wa idara ya ardhi kama Ilemela na Nyamagana mara zote nimekuwa nikifikiria kuwahamishia wilaya nyingine kama Geita kwa Mheshimiwa Rais, Dk. John  Magufuli ambako hakuna hata mmoja.

“Lakini  leo pamoja na wingi wenu mnaandaa hati 834 huku viwanja 16,000 mkishindwa kuvikamilisha kwa muda niliotoa.

“Sasa Mkurugenzi nakuambia kwamba Serikali imewavumilia  vya kutosha na sasa kama hautabadilika kwa muda ambao nimekuongezea kuanzia sasa hadi Juni 30, mwaka huu   tambua kwamba kitambi chako kitapata pancha.

“Wewe mwenyewe utajua namna ya kuiziba pancha hiyo, hatuwezi kuimba wimbo huo huo kila mwaka.

“Kuna viti vitu vidogo vidogo vya hapa halmashauri  mnavifinyia kazi lakini suala ambalo ni la muhimu    mnashindwa kukamilisha.

“Nilikuwa namuona mkurugenzi ni mjanja   lakini anachokifanya hapa ni kama kutwanga maji kwenye kinu kwa sababu kodi ya ardhi haikusanywi,” alisema.

 Waziri alisema Halmashauri za Ilemela na Nyamagana  zinatakiwa zikamilishe hatua hiyo  Juni 30, mwaka huu atakapoifunga rasmi na kutangaza ‘masterplan’ ya Jiji la Mwanza ifikapo Agosti.

Aliwataka wananchi kutambua kuwa baada ya kufungwa  urasimishaji makazi haitatokea    tena  fursa ya namna hiyo.

Alisema wananchi ambao hawatakuwa na hati ya eneo analoishi watahesabika kama wavamizi, hivyo watapoteza haki yao na maeneo hayo yatachukuliwa na Serikali kwa shughuli nyingine.

Lukuvi alisema Serikali kuu imetenga Sh bilioni 22 kwa ajili ya masterplan ya   Mwanza ambayo itaanza kutekelezwa Agosti mwaka huu,  kazi ambayo  itafanywa na wataalamu kutoka China.

JAMII YATAKIWA KUCHANGAMKIA FURSA ZA UPIMAJI WA ARDHI.

By: VIJIMAMBO on May 01, 2017 / comment : 0 , ,

Waziri wa Ardhi, Nyumba na Maendeleo ya Makazi, William Lukuvi akimkabidhi mkazi wa Lamadi, Mama Juma hati miliki ya eneo lake.
Waziri wa Ardhi, Nyumba na Maendeleo ya Makazi, William Lukuvi akizungumza na wananchi wa Lamadi juu ya kuwa na hati miliki ya maeneo yao
Waziri wa Ardhi, Nyumba na Maendeleo ya Makazi, William Lukuvi akifurahia jambo na wakazi wa Lamadi.


Na Shushu Joel,BUSEGA.
JAMII imetakiwa kuchangamkia fursa zinazoendelea kutolewa na serikali katika ufanikishaji wa wananchi wote kupima maeneo yao ili waweze kuwa wamiliki halali kwa kupatwa hati za kumiliki maeneo yao.

Rai hiyo imetolewa jana na Waziri wa Ardhi, Nyumba na Maendeleo ya nyumba ya Makazi, Mh William Lukuvi alipokuwa akikabidhi hati halali za umiliki wa maeneo kwa wakazi wa kata ya lamadi,wilaya ya Busega mkoani Simiyu.

Unapopimiwa eneo lako unakuwa na faida nalo kubwa sana ambalo kwa sasa ni vigumu kuiona na hii ni kutokana na jamii kutokuwa na elimu ya kutosha juu ya uthamani ya kumiliki wa hati ya eneo.

“Unapokuwa na hati ya kiwanja chako au nyumba yako unakuwa na thamani kubwa na hii ni kutokana na kuwa unaweza ukauaga umasikini kwa kukopesheka na mabenki mbalimbali na hivyo kuwa na mtaji wa kufanya biashara zako bila kuwa na usumbufu wa aina yeyote ile” alisema Mh Lukuvi.

Aliongeza kusema kuwa hati hizi nilizo zikabidhi iwe ni changamoto kwa wale waliokuwa wakiwaona maafisa ardhi wangu wakipima maeneo na kuona kama vile ni utani sasa kazi mmeiona nah ii iwe fundisho kwa wale wasiopenda kuamini mambo yanayofanywa na serikali ya awamu ya tano chini ya Rais Magufuli.

Aidha Waziri Lukuvi ameongeza wiki nne kwa maafisa Ardhi kumaliza kazi katika kata hito ua lamadi ili waweze khamia sehemu zingine kwani ambao bado waliokuwa awajapimiwa watapimiwa haraka ili kazi hiyo iweze kumalizika katika kata hiyo.

Kwa upande wake Afisa Ardhi Mteule wa wilaya ya Busega Magesa Magesa amemuhakikishia waziri Lukuvi kuwa ni lazima Busega yote ipimwe na wananchi kupatiwa hati za umiliki wa maeneo yao.

Aliongeza kuwa tulianza na lamadi nah ii ni kutokana kuwa kata hii inawakazi wengi kuliko kata zingine zote katika wilaya ya Busega.

Kwa upande wao walio kabidhiwa hati za umiliki wa maeneo yao wanesema kuwa waliokuwa wanabeza sasa wamekiona cha moto kwani waziri katukabidhi hati zetu halali za umiliki wa maeneo yetu na sasa tunao uwezo wa kukopesheka na kupata mitaji.

Musa Metusela ni mkazi wa lamadi na mfanyabiashara mkongwe katika eneo hilo anaeleza kuwa awali alikuwa akipata mkopo lakini si mkubwa wa kuweza kukidhi mahitaji yake ingawa nyumba yake inauweza wa kukopeshwa hata milioni 100 lakini kutokana na kutokuwa na hati ilimbidi apewe kiasi kidogo cha mkopo.

Alisema kuwa kwa sasa anaweza kupata mkopo mkubwa kutokana na kupata hati ya umiliki wa eneo lake.

Bi Joyce Magige ambaye ni mama wa watoto 4 aliyefiwa na mume wake miaka ya nyuma anasema kuwa sasa biashara zake zitafanyika nah ii ni kutokana na kuwa na uhakika wa kupata mkopo kutoka katika tasisi za kifedha kwani nyuma alikuwa anapata wakati mgumu kutokana na kutokuwa na umiliki wa eneo leke.

Aidha amempongeza waziri Lukuvi kwa kuwakabidhi hati zao kwani kuna baadhi ya wananchi waliokuwa wakiwacheka kwa kudai kuwa pesa zao zimeliwa na maafisa ardhi,sasa wamejionea wenyewe kuwa serikali ya JPM si ya ubabaishaji.

Aidha amewataka wananchi kutokuwa na tabia ya kusikiliza maneno ya watu wasio na mawazo mazuri kwani hao ni sawa na wale wanao kwamisha maendeleo ya nchi.

Waziri Lukuvu Amnyang'anya Ardhi Makonda

By: VIJIMAMBO on February 28, 2017 / comment : 0 , ,

Wizara ya Ardhi, Nyumba na Maendeleo ya Makazi imesema itamchukulia hatua muwekezaji aliyetoa ardhi kwa serikali ya mkoa wa dar es Salaam kwa ajili ya ujenzi wa viwanda, kwa madai kuwa ardhi aliyoitoa siyo yake.

Waziri wa wizara hiyo, William Lukuvi, alitoa kauli hiyo jana jijini Dar es Salaam na kufafanua kuwa muwekezaji huyo aliidanganya serikali pamoja na kumdanganya mkuu wa mkoa wa Dar es Salaam Paul Makonda, ambaye ndiye aliyekabidhiwa eneo hilo kwa niaba ya serikali.

Mbali na kosa la kuidanganya serikali, Lukuvi pia alisema atamchukulia hatua mfanyabiashara huyo kwa kumiliki ardhi kinyume cha sheria.

Kuhusu Mkuu wa Mkoa , Paul Makonda, Lukuvi alisema tayari amekwishafanya naye mawasiliano na kumuelewesha kuwa alidanganywa kwa kuambiwa kuwa anapewa eneo kwa ajili ya viwanda, huku eneo lenyewe likiwa ni mali ya serikali.

Siku ya Jumanne wiki iliyopita Makonda alikabidhiwa ekari 1500 za ardhi na Mkurugenzi wa Azimio Housing Estate Mohamed Iqbal kwa ajili ya ujenzi wa viwanda vidogo vigogo nchini, katika eneo la Kigamboni Dar es Salaam.

Akizungumza mara baada ya makabidhiano hayo eneo la Kisarawe II wilaya ya Kigamboni Mkurugenzi huyo alisema wameamua kumkabidhi eneo hilo ili kuunga mkono jitihada za Rais Magufuli za kuijenga Tanzania ya viwanda na kuwakomboa wananchi wenye uchumi wa kati.

Kwa upande wake Makonda alieleza kuwa dhamira ya viwanda ya Rais Magufuli inabidi itafsiriwe kwa vitendo, hivyo eneo hilo litatumika kwa ajili ya ufugaji, kilimo, usindikaji, utengenezaji wa sabuni na eneo hilo litatumika na wilaya zote.

WAKWEPA KODI WA ARDHI NA MAJENGO HADHARANI WIKI IJAYO

By: VIJIMAMBO on December 30, 2016 / comment : 0 , ,

Waziri wa Ardhi, Nyumba na Maendeleo ya Makazi, William Lukuvi amesema kwamba kuanzia wiki ijayo wizara yake itawatangaza hadharani watu wote ambao wamekwepa kulipa kodi ya ardhi na majengo, wakiwemo vigogo walioko serikalini.
Akifungua semina juu ya jukumu la vyombo vya habari katika kutoa elimu ya sheria, kanuni na taratibu katika utawala wa ardhi ili kusaidia kutatua migogoro, iliyofanyika mjini Morogoro, Lukuvi alisema kwamba watayatangaza majina hayo ili watu wawajue watu wanaojenga majumba ya kifahari lakini hawataki kulipa kodi ya serikali.
“Tutatangaza majina yao halisi sio yale ya bandia, ili watu wawajue kuwa kuna watu wamejenga majumba ya fahari, lakini hawalipi kodi ya serikali, baada ya kutangaza tutawapiga faini. Na mwakani tutaweka kodi kubwa zaidi kwa mashamba na viwanja visivyoendelezwa,” alisema Lukuvi.
Aidha Waziri Lukuvi alisema hata hivyo kwa sasa upigaji umepungua wizarani kwake “Hakuna siri, wizi hakuna, ujambazi, rushwa zimepungua sana, mtu akiniambia ameombwa rushwa pale wizarani nitamshangaa, tunataka iwe wizara salama inayotoa hati kwa haraka,” alisema. Miaka 10 nchi yote iwe imepangwa, kupitia kanda nane ili kuepusha watu wote kwenda makao makuu ya wizara kwa ajili ya kufuatilia hati kusajiliwa.”

CHANZO: HABARILEO

MKUTANO MKUU NA KONGAMANO LA WAPIMAJI ARDHI LAFUNGULIWA JIJINI DAR ES SALAAM

By: VIJIMAMBO on November 02, 2016 / comment : 0 , ,

Ndugu wasomaji wetu tunaomba support yenu kwa kutangaza nasi hapa kwenye hii blog kwa bei nafuu ili tuweze kuendelea kutoa habari bila tatizo lolote. Wasiliana nasi kupitia namba +255713363965 / +255755274953. Tunashukuru kwa ushirikiano wenu.


Waziri Ardhi, Nyumba na Maendeleo ya Makazi, Mhe. William Lukuvi akifungua mkutano mkuu na Kongamano la Wapimaji Ardhi linalofanyika jijini Dar es Salaam kuanzia leo Novemva 2-3, 2016.
Waziri Ardhi, Nyumba na Maendeleo ya Makazi, Mhe. William Lukuvi akionyeshwa moja ya vifaa vinavyotumika katika upimaji wa Ardhi mapema leo katika Mkutano mkuu na Kongamano la Wapimaji Ardhi unaofanyika jijini Dar es Salaam.
Waziri Ardhi, Nyumba na Maendeleo ya Makazi, Mhe. William Lukuvi akipewa maelezo jinsi mambo yalivyobadirika katika mfumo wa Kidigitali.
Waziri Ardhi, Nyumba na Maendeleo ya Makazi, Mhe. William Lukuvi akiwa amebeba moja ya kifaa kinachotumika katika upimaji.
Waziri Ardhi, Nyumba na Maendeleo ya Makazi, Mhe. William Lukuvi akionyeshwa kifaa cha kisasa kinachotumika katika upimaji.
Wapimaji wa Ardhi wakiwa katika mkutano Mkuu na Kongamano la Wapimaji Ardhi.
Wapimaji wa Ardhi wakiwa katika mkutano Mkuu na Kongamano la Wapimaji Ardhi.
Waziri Ardhi, Nyumba na Maendeleo ya Makazi, Mhe. William Lukuvi akitoa cheti cha shukrani kwa makampuni yaliweza kusaidia kufanikisha mkutano Mkuu na Kongamano la Wapimaji Ardhi. Pembeni kushoto ni Mkurugenzi wa Upimaji na Ramani, Bw. Justo Lyamuya.
Subscribe to: Posts (Atom)

Copyright (c) 2024 Gadiola Emanuel All Right Reserved

0784 643 633

Template by AP | Developed by Gadiola Emanuel