HABARI

Theme images by kelvinjay. Powered by Blogger.

MATUKIO

MICHEZO

SIASA

ECOBANK TANZANIA YAIMARISHA USHIRIKIANO NA SHULE BINAFSI KUPITIA HUDUMA MAALUM ZA KIFEDHA



Ecobank Tanzania imeendelea kuimarisha ushirikiano na Taasisi za elimu nchini kwa kuweka mikakati ya kutoa suluhisho za kifedha zinazolenga kusaidia shule binafsi kukua na kujiendesha kwa uendelevu, ikiwa ni sehemu ya mpango wake wa kupanua huduma za kifedha katika sekta ya elimu.

Katika kuendeleza mkakati huo, benki hiyo imeandaa mkutano maalumu wa kifungua kinywa kwa Wakurugenzi Wakuu na viongozi wa shule binafsi (Private School CEOs’ Breakfast on Sustainable School Finance), uliofanyika Novemba 16, 2026, katika Hoteli ya Serena, Dar es Salaam, uliowakutanisha viongozi wa Taasisi za elimu na wadau mbalimbali kujadili mikakati ya upatikanaji wa fedha na ukuaji endelevu wa shule.

Akizungumza katika mkutano huo, Mkurugenzi Mtendaji wa Ecobank Tanzania, Dkt. Charles Asiedu, alisema mpango huo ni sehemu ya juhudi za benki hiyo kuimarisha ushirikiano na taasisi za elimu nchini kwa kuelewa mahitaji yao ya kifedha na kutoa huduma zinazozingatia mazingira na uwezo wa kila shule.

Alisema Ecobank inalenga kupanua ushirikiano na shule nyingi zaidi nchini kupitia vyama mbalimbali vya wamiliki na waendeshaji wa shule, akieleza kuwa mawasiliano ya karibu na viongozi wa shule yataisaidia benki kubuni suluhisho za kifedha zitakazochochea ukuaji, kuongeza ufanisi wa uendeshaji na kuhakikisha taasisi hizo zinaendelea kuwa endelevu.

Kupitia huduma maalumu za kifedha kwa sekta ya elimu (Education Financial Services), Ecobank inatoa suluhisho mbalimbali zikiwemo mikopo ya ujenzi na upanuzi wa madarasa, maabara, maktaba na mabweni; ufadhili wa ununuzi wa mabasi ya shule, kompyuta na vifaa vya kufundishia; mitaji ya kuendesha shughuli za kila siku; pamoja na huduma za kidijitali za ukusanyaji wa ada na usimamizi wa fedha. Aidha, benki hiyo inatoa huduma za kibenki kwa wafanyakazi wa shule ili kuwawezesha kupata huduma zinazochangia ustawi wao wa kifedha.

Dkt. Asiedu alisisitiza kuwa Ecobank haitaki kuwa mtoa huduma za kibenki pekee, bali mshirika wa kimkakati wa taasisi za elimu katika kutekeleza mipango yao ya maendeleo. Aliwahimiza wamiliki na wasimamizi wa shule kushirikiana na benki zao mapema kwa kueleza mipango ya upanuzi na uwekezaji wanaokusudia kufanya ili kupata suluhisho zinazolingana na mahitaji na uwezo wao wa kifedha.

Aidha, mkutano huo umefanyika wakati sekta ya elimu nchini ikijiandaa na mabadiliko yanayotarajiwa katika idadi ya wanafunzi wanaojiunga na shule, yakiwemo makadirio ya kundi kubwa la wanafunzi wanaotarajiwa kuingia katika mfumo wa elimu mwaka 2028 (double cohort). Hali hiyo inatarajiwa kuongeza mahitaji ya miundombinu, vifaa vya kujifunzia na uwezo wa shule kutoa huduma bora, hivyo kuhitaji mipango madhubuti ya kifedha. Kupitia mpango huo, Ecobank inalenga kuendelea kushirikiana na wadau wa elimu kujenga shule imara na endelevu zitakazochangia maendeleo ya elimu na uchumi wa Tanzania.
Mkurugenzi Mtendaji wa Ecobank Tanzania, Dkt. Charles Asiedu akizungumza na Wakurugenzi Wakuu na viongozi wa shule binafsi (Private School CEOs’ Breakfast on Sustainable School Finance) kwenye mkutano maalum uliofanyika Novemba 16, 2026 jijini Dar es Salaam.


Baadhi ya wafanyakazi wa Ecobank Tanzania pamoja na Wakurugenzi Wakuu na viongozi wa shule binafsi (Private School CEOs’ Breakfast on Sustainable School Finance) wakifuatilia hotuba ya mgeni rasmi Mkurugenzi Mtendaji wa Ecobank Tanzania, Dkt. Charles Asiedu.
Picha ya pamoja

WAZIRI MKUU AIPONGEZA WIZARA YA UCHUKUZI KWA UFANISI WA USHIRIKIANO NA SEKTA BINAFSI, AITAKA KUONGEZA KASI KUELEKEA DIRA 2050


Waziri Mkuu wa Jamhuri ya Muungano wa Tanzania, Mhe. Dkt. Mwigulu Nchemba, ameipongeza Wizara ya Uchukuzi kwa hatua zilizopigwa katika kuendeleza miundombinu na huduma za uchukuzi kupitia ushirikiano na sekta binafsi, huku akisisitiza kuongezwa kwa kasi, ufanisi na uwajibikaji katika utekelezaji wa miradi kuelekea Dira ya Taifa ya Maendeleo 2050

Dkt. Nchemba ametoa pongezi hizo Novemba 16, 2026, wakati akifungua Mkutano wa 19 wa Tathmini ya Pamoja ya Sekta ya Uchukuzi (JTSR) jijini Mwanza, akieleza umuhimu wa kuimarisha ushirikiano kati ya Serikali na sekta binafsi katika kuongeza uwekezaji na kuboresha utoaji wa huduma za uchukuzi

Amesisitiza kuwa pamoja na hatua zilizofikiwa, sekta hiyo inapaswa kuongeza kasi ya utekelezaji wa miradi, kuimarisha matengenezo ya miundombinu na usalama, pamoja na kuweka mikakati ya kukabiliana na changamoto za upungufu wa fedha na ucheleweshaji wa miradi

Akitoa salamu za Wizara, Waziri wa Uchukuzi, Prof. Makame Mbarawa, amesema Serikali imeendelea kupiga hatua katika kuendeleza miundombinu ya reli, barabara, bandari na anga, sambamba na kuimarisha mifumo ya udhibiti na usimamizi wa sekta hiyo

Amesema mkutano huo unaofanyika Novemba 16–18, 2026, wenye kaulimbiu ya “Kuharakisha Utoaji wa Huduma Jumuishi za Uchukuzi, Ufadhili Endelevu na Uwajibikaji wa Sekta kuelekea Dira ya Taifa ya Maendeleo 2050” ni jukwaa muhimu la kutathmini mafanikio, kubaini changamoto na kuweka mikakati ya kuongeza ufanisi wa sekta

Awali, Makamu Mwenyekiti wa Kamati ya Kudumu ya Bunge ya Miundombinu, Mhe. Abubakar Assenga, ameipongeza Serikali kwa uwekezaji katika miundombinu ya uchukuzi na kusisitiza umuhimu wa kuimarisha usimamizi wa miradi ili kuhakikisha inakamilika kwa wakati na kuleta tija kwa wananchi na taifa.
Waziri Mkuu wa Jamhuri ya Muungano wa Tanzania, Mhe. Dkt. Mwigulu Nchemba akionesha tuzo mara baada ya kukabidhiwa na Waziri wa Uchukuzi, Prof. Makame Mbarawa wakati wa ufunguzi wa Mkutano wa 19 wa Tathmini ya Pamoja ya Sekta ya Uchukuzi (JTSR) jijini Mwanza
Waziri Mkuu wa Jamhuri ya Muungano wa Tanzania, Mhe. Dkt. Mwigulu Nchemba akipokea tuzo kutoka kwa Waziri wa Uchukuzi, Prof. Makame Mbarawa wakati wa ufunguzi wa Mkutano wa 19 wa Tathmini ya Pamoja ya Sekta ya Uchukuzi (JTSR) jijini Mwanza.
Waziri Mkuu wa Jamhuri ya Muungano wa Tanzania, Mhe. Dkt. Mwigulu Nchemba akimkabidhi tuzo Waziri wa Uchukuzi, Prof. Makame Mbarawa wakati wa ufunguzi wa Mkutano wa 19 wa Tathmini ya Pamoja ya Sekta ya Uchukuzi (JTSR) jijini Mwanza.
Waziri Mkuu wa Jamhuri ya Muungano wa Tanzania, Mhe. Dkt. Mwigulu Nchemba akizungumza na wadau mbalimbali wa Usafirishaji wakati wa ufunguzi wa Mkutano wa 19 wa Tathmini ya Pamoja ya Sekta ya Uchukuzi (JTSR) jijini Mwanza.
Waziri wa Uchukuzi, Prof. Makame Mbarawa akisoma hotuba pamoja na kumkaribisha mgeni rasmi Waziri Mkuu wa Jamhuri ya Muungano wa Tanzania, Mhe. Dkt. Mwigulu Nchemba wakati wa ufunguzi wa Mkutano wa 19 wa Tathmini ya Pamoja ya Sekta ya Uchukuzi (JTSR) jijini Mwanza.
Makamu Mwenyekiti wa Kamati ya Kudumu ya Bunge ya Miundombinu, Mhe. Abubakar Assenga akitoa salamu za Kamati ya Bunge wakati wa ufunguzi wa Mkutano wa 19 wa Tathmini ya Pamoja ya Sekta ya Uchukuzi (JTSR) 








 Mkutano ukiendelea


Picha za pamoja


ELIMU YA UHASIBU YAWAFIKIA BAGAMOYO


Bodi ya Taifa ya Wahasibu na Wakaguzi wa Hesabu Tanzania (NBAA) imeendelea kuimarisha juhudi za kutoa elimu kwa wanafunzi wa shule za sekondari na Taasisi za elimu ya juu nchini, ikiwa ni sehemu ya mkakati wa kukuza Taaluma ya Uhasibu na kuongeza uelewa kuhusu majukumu ya Bodi hiyo na fursa zilizopo katika Taaluma hiyo.

Katika mwendelezo wa juhudi hizo, wanafunzi wa Shule ya Sekondari Bagamoyo wametembelea NBAA na kupatiwa mafunzo maalumu yaliyolenga kuwajengea uelewa kuhusu shughuli za Bodi, majukumu yake na fursa mbalimbali za kitaaluma katika sekta ya Uhasibu.

Akizungumza wakati wa mafunzo hayo, Mkurugenzi Mtendaji wa NBAA, CPA Prof. Siasa I. Mzenzi, aliipongeza shule hiyo kwa kuwawezesha wanafunzi kupata elimu ya vitendo nje ya darasa, hususan wale wanaosoma masomo ya biashara na uhasibu. Aliwahimiza wanafunzi kufanya vizuri katika masomo yao ili kufikia malengo waliyojiwekea, akisisitiza umuhimu wa Taaluma ya Uhasibu katika Taasisi mbalimbali za umma na binafsi.

"Na pia kuanzia mwaka huu 2026 Bodi hii imeanzisha Tuzo maalumu kwa wanafunzi watakaofanya vizuri katika mitihani ya kitaifa, hususan katika masomo ya Uhasibu, ikiwa ni njia ya kutambua, kuhamasisha na kuendeleza Taaluma ya Uhasibu." alisema CPA Prof. Siasa I. Mzenzi

CPA Malendeja alieleza kuwa, kuwajengea wanafunzi msingi wa uhasibu katika hatua za awali za masomo kutawasaidia kujiandaa kuwa wataalamu bora wa baadaye ambapo alisisitiza pia umuhimu wa kuzingatia maadili ya Taaluma hiyo, ikiwemo uadilifu, uaminifu, uwajibikaji na kufanya kazi kwa bidii, akibainisha kuwa misingi hiyo ni muhimu katika kulinda na kuendeleza hadhi ya Taaluma ya Uhasibu.

Kwa upande wake, Mkuu wa Kitengo cha Uhusiano na Mawasiliano wa NBAA, Magreth Kageya, alisema ziara hiyo imewapa wanafunzi fursa ya kupata taarifa sahihi kuhusu majukumu ya Bodi na kuelewa zaidi fursa zilizopo katika Taaluma ya Uhasibu. Aliongeza kuwa ziara za aina hiyo huwasaidia wanafunzi kufanya maamuzi sahihi kuhusu mustakabali wao wa kitaaluma kwa kuhusisha maarifa wanayopata darasani na mazingira halisi ya kazi.

"Ziara hii ni sehemu ya juhudi endelevu za NBAA za kukuza Taaluma ya Uhasibu nchini kwa kuwajengea wanafunzi uelewa wa mapema kuhusu Taaluma hii na kuwaandaa wataalamu wenye maarifa, ujuzi na maadili yanayohitajika katika soko la ajira la ndani na nje yaani kitaifa na kimataifa, pamoja na kuchangia maendeleo ya uchumi wa nchi." Alisema Magreth Kageya.
Mkurugenzi Mtendaji wa Bodi ya Taifa ya Wahasibu na Wakaguzi wa Hesabu Tanzania (NBAA), CPA Prof. Siasa I. Mzenzi akizungumza na wanafunzi wa Kidato cha tano na sita wanaosoma masomo ya Biashara katika Shule ya Sekondari ya Bagamoyo waliotembelea na kupata mafunzo katika ofisi za Bodi ya NBAA zilizopo jijini Dar es Salaam.
CPA Kulwa Malendeja, Mkurugenzi wa Huduma za Shirika wa NBAA akizungumza na wanafunzi wa Kidato cha tano na sita wanaosoma masomo ya Biashara kutoka Shule ya Sekondari ya Bagamoyo waliotembelea na kupata mafunzo katika ofisi za NBAA zilizopo jijini Dar es Salaam.
Magreth Kageya, Mkuu wa Kitengo cha Uhusiano na Mawasiliano ya Umma wa NBAA akitoa mada kuhusu kazi mbalimbali zinazofanywa na NBAA "NBAA Overview" kwa wanafunzi wa Kidato cha tano na sita wanaosoma masomo ya Biashara katika Shule ya Sekondari ya Bagamoyo waliotembelea na kupata mafunzo katika ofisi za Bodi ya NBAA.
Mfanyakazi wa NBAA, Humphrey Symphorian akitoa mada kuhusu njia za Taaluma katika uhasibu pamoja na mitihani ya kitaaluma kwa wanafunzi wa Kidato cha tano na sita wanaosoma masomo ya Biashara katika Shule ya Sekondari ya Bagamoyo waliotembelea na kupata mafunzo katika ofisi za Bodi ya NBAA.
Mfanyakazi wa NBAA, CPA Amiri Mjema akitoa mada kuhusu Mirabaha ya uhasibu na uhasibu wa mishahara, pamoja na ukokotoaji wa kodi ya PAYE kwa wanafunzi wa Kidato cha tano na sita wanaosoma masomo ya Biashara katika Shule ya Sekondari ya Bagamoyo.
CPA. Bertha Kipangula, Mkuu wa Sehemu ya Usajili wa Wanachama, Uzingatiaji wa Sheria na Maendeleo ya Kitaaluma akitoa elimu kuhusu fursa za kazi katika mazingira halisi na muhtasari wa Maendeleo Endelevu ya Kitaaluma (CPD) kwa wanafunzi wa Kidato cha tano na sita wanaosoma masomo ya Biashara katika Shule ya Sekondari ya Bagamoyo.
CPA Mike akitoa elimu kuhusu viwango vya Uhasibu na utoaji wa taarifa za fedha kwa wanafunzi wa Kidato cha tano na sita wanaosoma masomo ya Biashara katika Shule ya Sekondari ya Bagamoyo waliotembelea na kupata mafunzo katika ofisi za Bodi ya NBAA.
Baadhi ya wafanyakazi wa NBAA na wanafunzi wa Kidato cha tano na sita wanaosoma masomo ya Biashara katika Shule ya Sekondari ya Bagamoyo wakifuatilia mada kwa wataalam kutoka Bodi ya Taifa ya Wahasibu na Wakaguzi wa Hesabu (NBAA) walipotembelea ofisi za Bodi hiyo zilizopo jijini Dar es Salaam.
Mkurugenzi Mtendaji wa Bodi ya Taifa ya Wahasibu na Wakaguzi wa Hesabu Tanzania (NBAA), CPA Prof. Siasa I. Mzenzi (katikati waliokaa) akiwa kwenye picha ya pamoja na CPA Kulwa Malendeja, Mkurugenzi wa Huduma za Shirika wa NBAA (wa pili kulia waliokaa), walimu pamoja na wanafunzi wa kidato cha tano na sita wa Shule ya Sekondari ya Bagamoyo.